कञ्चनपुर /कञ्चनपुरमा ट्याक्टरले स्कुटीलाई ठक्कर दिँदा दुई जना घाइते भएका छन्। दुर्घटनापछि ट्याक्टर चालक फरार भएका छन्।
जिल्ला प्रहरी कार्यालय कञ्चनपुरका अनुसार भीमदत्त नगरपालिका–५ बनगाउँ साइपन नजिकै बुधबार साँझ करिब ७ः३० बजे दुर्घटना भएको हो। भाइरल रोड हुँदै महेन्द्रनगर बजारतर्फ जाँदै गरेको सुदूरपश्चिम प्रदेश ०२–००४ प ६५८९ नम्बरको स्कुटीलाई विपरीत दिशाबाट आइरहेको नम्बर नखुलेको ट्याक्टरले ठक्कर दिएको प्रहरीले जनाएको छ।
दुर्घटनामा स्कुटी चालक सोही स्थानका २१ वर्षीय राहुल तिरुवा घाइते भएका छन्। उनलाई टाउको, अनुहार र बाँया आँखामाथि चोट लागेको छ। यस्तै स्कुटीको पछाडि सवार भीमदत्त नगरपालिका–१४ बनकट्टीकी १७ वर्षीया विपना जोशीको पनि टाउको र अनुहारमा चोट लागेको प्रहरीले जनाएको छ।
घाइते दुवै जनाको महाकाली प्रादेशिक अस्पतालमा सामान्य उपचारपछि थप उपचारका लागि साँझ ८ः१५ बजे निसर्ग अस्पताल धनगढी रिफर गरिएको जिल्ला प्रहरी कार्यालय कञ्चनपुरले जानकारी दिएको छ।
दुर्घटनामा संलग्न ट्याक्टर र चालकको खोजी कार्य जारी रहेको प्रहरीले जनाएको छ।